പവിത്രമോതിരവും വ്രതശുദ്ധിയും

പവിത്രമോതിരം നിര്‍മ്മിക്കുന്നത് വ്രതശുദ്ധിയോടുകൂടിയാണ്. മൂന്നു ദിവസത്തെ അതിസൂക്ഷമവും, കഠിനവുമായ പ്രവര്‍ത്തനം വേണം ആ മോതിരത്തിന്‍റെ നിര്‍മ്മാണത്തിന്. മോതിരം നിര്‍മ്മിച്ചതിനുശേഷം ശ്രീ സുബ്രഹ്മണ്യസ്വാമിക്ഷേത്രത്തില്‍ പൂജിക്കുക എന്നൊരു ചടങ്ങുണ്ട്. എന്നിട്ടേ ഏല്‍പ്പിച്ച ആള്‍ക്ക് അതു നല്‍കുകയുള്ളൂ. പൂജയ്ക്ക് ശേഷം ദൈവീകസാന്നിധ്യം സിദ്ധിക്കുന്നുവെന്നാണ് വിശ്വാസം.

പവിത്രമോതിരത്തില്‍ ത്രിമൂര്‍ത്തികളുടെ സാന്നിധ്യമുണ്ടെന്നും അതുകൊണ്ട് അത് പാപഹരമാണെന്നും പൗരാണിക സങ്കല്‍പ്പമുണ്ട്. ഇതാണ് പവിത്രമോതിരം ധരിക്കുന്നത് ഭൗതികവും ആത്മീയവുമായ ശ്രേയസ്സിന് ഗുണപ്രദമാണെന്ന വിശ്വാസത്തിനടിസ്ഥാനം.

എന്നാല്‍ പവിത്രമോതിരം ധരിക്കുന്നവരും ജീവിതത്തില്‍ ചില ചിട്ടകളൊക്കെ അനുഷ്ഠിക്കേണ്ടതുണ്ട്. മത്സ്യം, മാംസം, മദ്യം തുടങ്ങിയവ വര്‍ജ്ജിക്കണമെന്നത് പവിത്രധാരണത്തിന്‍റെ പൊതുനിയമമാണ്. പവിത്രമോതിരം കലാഭംഗിയുള്ളതാണെങ്കിലും അത് കേവലം അലങ്കാരത്തിനുവേണ്ടി ധരിക്കാനുള്ളതല്ല. പവിത്രമായ സങ്കല്പമാണ് അതിന്‍റെ പിറകിലുള്ളത്.